රූපශ්‍රීයෙන් අගතැන්පත් තැනැත්තිය තේරීම අද මෙන්ම බුද්ධ කාලයේදී පවා සිදු වූ බවට තොරතුරු බෞද්ධ අටුවා ග්‍රන්ථවල සඳහන් වේ. එලෙස තෝරාගත් තැනැත්තිය ජනපද කල්‍යාණිය, නගර ශෝභනීය ලෙස රාජකීය තනතුරකින් පුදා ඇය රාජ කුමාරවරුන්ගේ හා ප්‍රභූන්ගේ පොදු වස්තුවක් බවට පත් කර තිබේ. රූපයෙන් අගතැන්පත්ම තැනැත්තිය එලෙස පොදු වස්තුවක් බවට පත්කර ඇත්තේ රාජ කුමාරවරුන්, ප්‍රභූන් අතර ඇය දිනාගැනීමට අරගල, කලකෝලාහල ඇතිවීම වළකාලීමේ එක් උපක්‍රමයක් ආකාරයට බවටද පැහැදිලිය.
බුදුන් දවස සුන්දරියන් තෝරා ගැනීමේදී සලකා බැලූ ඇතැම් කරුණු කාරණා වර්තමානයේදී රූපරාජිනියන් තෝරා ගැනීමේදී එලෙසින්ම අනුගමනය කරන බව පෙනෙන්නට තිබේ. එදා රූපසුන්දරියක සතු නොවිය යුතු ශරීර දෝෂ හයක් පිළිබඳව අටුවාවේ සඳහන් වේ.
රූපසුන්දරියක සතු නොවිය යුතු ශරීර දෝෂ
1. ඉතා උස නොවිය යුතුය
2. ඉතා මිටි නොවිය යුතුය
3. ඉතා සිහින් නොවිය යුතුය
4. ඉතා තර නොවිය යුතුය.
5. ඉතා කළු පැහැ නොවිය යුතුය
6. ඉතා සුදු පැහැති නොවිය යුතුය
ඉහත ශරීර දෝෂ හයෙන් තොර වූ මෙන්ම පංචකල්‍යාණයෙන් අගතැන්පත් වීම රූපසුන්දරියක සතු විය යුතු ලක්ෂණ ලෙස පිළිගැනිණ.
රූපසුන්දරියක අගතැන්පත් විය යුතු පංචකල්‍යාණය
1. ඡවි කල්‍යාණය
නොපීදුණු තැඹිලි මලක රන්වන් පැහැයට සමාන නැතිනම් තණහාල් නම් රන්වන් පැහැති සහල් වර්ගයේ පැහැයට සමාන වූ උඩු සමකින් යුතු වීම ඡවි කල්‍යාණය ලෙස එදා හැඳින්විය.
2. මාංශ කල්‍යාණය
මුහුණේ සිට දෙපතුල දක්වා වාත්තු කළාක් බඳු වූ මෘදු මොලොක් මාංශයන්ගෙන් පිරිපුන් වීම මාංශ කල්‍යානය සැලකිණ.
3. නහරූ කල්‍යාණය
එළියට ඉලිප්පී නැති පෙනෙන නොපෙනෙන ආකාරයේ සියුම් නාලිකා වන්ගෙන් පිරී තිබිම නහරූ කල්‍යාණය සේ සැලකිණ. එයම තවත් විටෙක නඛ කල්‍යාණය (නිය) නැතිනම් කේෂ කල්‍යාණය ලෙස ද සැලකූ අවස්ථා ද විය.
4. අස්ථි කල්‍යාණය
අස්ථි කල්‍යාණය ලෙස සලකනු ලැබුවේ දසන් දෙපළය. එකි’නෙක මනාව ස්පර්ශ වූ හිඩැස්වලින් තොර පිරිසිදු පබලු පෙළක් බඳු දසන් දෙපළකින් යුතු වීම අස්ථි කල්‍යාණය සේ සැලකිණ.
5. වසස් කල්‍යාණය
වයසට වඩා ළාබාල වූ පෙනුමකින් යුතු වීම වයස් කල්‍යාණය සේ සැලකිනි. සියවසක් වුවද සොළොස් වියැති තරුණියකගේ බඳු පෙනුමකින් යුතු විය යුතු බව අටුවාවේද සඳහන් විය.
බුදු බණට අනුව රූමත් බව ලැබිමට හේතුපෙර කී ආකාරයේ ශරීර දෝෂ හයෙන් තොරව හා පංචකල්‍යාණයෙන් හෙබි රූපශ්‍රීයකට උරුමකම් ලැබිම බුදු දහමට අනුව විශාල භාග්‍යයකි. පිනකි. අන් අයගේ ආකර්ෂණයට ලක්වන ආකාරයේ නෙත් සිත් පිනවන රූපයකින් යුත් නැතැත්තියකවීම බුදුදහමට අනුව උපධිසම්පත්තියයි. එය පෙර ආත්ම භවයන්හි දැඩි ඊර්ෂ්‍යාවෙන් ක්‍රෝධයෙන් වෛරයෙන් තොරව හා අන් අය කෙරෙහි මෙත් සිතින් කරුණාවෙන් පිරි ජීවිතගත කළ පිනෙහි බලමහිමයෙන් උරුම වන්නකි. කොතරම් අගහිඟකමින් පිරි දිළිඳු පවුලක උපත ලැබූවද උපධිසම්පත්තියෙන් යුත් තැනැත්තිය මතු දිනක සැප සම්පත්වලින් පිරි ජීවිතයකට උරුමකම් ලැබිමට වාසනාවන්ත වේ.
බුදු දහමට අනුව ඊළඟ ආත්ම භවයේ රූපශ්‍රීයෙන් අගතැන්පත් වීමට නම් මේ භවයේදී දැඩි ඊර්ෂ්‍යාවෙන් ක්‍රෝධයෙන් වෛරයෙන් තොරව මෙත් සිතින් ජීවත් විය යුතු බව පැවැසේ. ඒ ආකාරයට ජීවත් වන්නන්ට එහි පින අත්විඳීමට ඊළඟ ආත්මය තෙක් යෑමට අවශ්‍ය වන්නේ නැති බව අද වන විට විද්‍යානුකූලව පවා ඔප්පු කළ සත්‍යයකි. ක්‍රෝධයෙන් වෛරයෙන් තොර වූ මෛත්‍රි්‍රයකින් ජීවත් වන අය ප්‍රභාමත් වන්නට විද්‍යානුකූලව බලපාන හේතු සාධක අද වන විට සොයාගෙන තිබේ. පංච කල්‍යාණයෙන්ම අගතැන්පත්ම ජීවත් වීමට යහපත් චිත්ත ශක්තීන් හි විශාල බලපෑමක් ඇති බව විද්‍යානුකූලව ද තහවුරු කළ සත්‍යයකි.
පෙර පිනෙන් හිමි වූ රූමත් බව අව භාවිත කිරීම පවකි. රූමත් බව නිසාම හිමිවන අන් අයගේ ආකර්ෂණය පිළිගැනීම හේතුවෙන් මාන්නයෙන් පිම්බෙන කාන්තාවෝද සිටිති. බුදු බණට අනුව මානය වඳුරකු බවට පත් කරයි. අභිමානය බල්ලකු බවට පත් කරයි.
අද සමාජයේ රූමත් බව වැරදි ආකාරයට යොදා ගනිමින් ඉන් පලප්‍රයෝජන ලබා ගන්නට පෙළඹෙන කාන්තාවන්ද විරල නොවේ. සමහරවිට රූමත් බව නිසා පුරුෂ පක්ෂයේ ආකර්ෂණයට ලක් වෙද්දී ඉන් වැරදි ආකාරයට ප්‍රයෝජන ගනිමින් පිරිමින් කිහිප දෙනකු සමගම ආදර සබඳතාවල පැටලෙන කාන්තාවෝද සිටිති. විවාහ වූ පසුව පවා එවැනි දේට යොමු වන කාන්තාවන් පිළිබඳව උදාහරණ විරල නැත.
ඒ සියලු දෙනා අතින්ම සිදුවන්නේ පෙර පිනෙන් තමන්ට උරුම වූ රූමත් බව වැරදි ආකාරයට භාවිතා කිරීමයි. එය ඊළඟ ආත්මභවවලදී පලවිපාක ලැබෙන පාපකර්මයන් බව බුදු බණේ සඳහන් වුවද එහි පල විපාක ගෙවී යන ආත්මයේදීම විපාක ලබන ආකාරයන් ඇස්පනාපිටම දැකිය හැකි අවස්ථා බොහෝය.
රූමත් බව අවියක් කොටගෙන එකවර ප්‍රේම සබඳතා දෙක තුන පවත්වා ගෙන යාමට පෙළඹුණ තරුණියන්ට එහි විපාක මේ අත්භවයේදීම අත්විඳින්නට සිදුවීම ඒකාන්තය. එකි’නෙකාට හොර රහසේ පවත්වාගෙන යන එවැනි සබඳතා හෙළිදරව් වූ විට නින්දා අපහාස අවමන් පමණක් නොවේ අවියක් කොට ගත් රූපය විකෘතිකර දමන තරමේ පළිගැනීම්වලට පවා භාජනය වීම සිදු නොවිය හැකි නොවේ.
රූමත් බව යථාවබෝධයට කමටහනක් කර ගන්නකොතරම් මනස්කාන්ත රූපයකට උරුමකම් ලැබුවද එහි පැවැත්ම කොතරම් කෙටි කාලෙකට ද යන්න නිතර නිතර මෙනෙහි කිරීම තුළ යථාර්ථය අවබෝධකරගත හැකිය. තම සිරුර ක්‍රමයෙන් වෙනස් වෙමින් වියැකී යන ආකාරය මෙනෙහි කිරීම සංවර බවක් ඇතිකර ගැනීමට හේතු වේ. එවිට රූමත් බව වැරදි ආකාරයට යෙදවීමට එරෙහිව තම සිතට ස්වයං පාලනයක් ඇති කරවයි.
මෙම යථාර්ථය අවබෝධකර ගැනීම තුළ ශාරීරිකව වියැකී ගියද උතුම් මනසකින් යුතුව යහපත් ජීවිතයක් ගත කිරීමට භාග්‍ය ලැබේ. එවිට කමෛන් කමෛන් වැහැරී, වියැකී යන සුන්දරත්වය දරාගැනීමට බැරි තරම් මානසික පීඩාවක් නොකරගෙන එය ජීවිතයේ ස්වභාවයයි අවබෝධයෙන් ඊට මුහුණ දීමට හැකියාව ලබා ගත හැකිය.
nirwanaya.com
